Diwylliant Goruchafiaeth Gwyn

O Dismantling Racism: A Workbook for Social Change Groups gan Kenneth Jones a Tema Okun, Changework, 2011

Mae rhai pobl yn ymateb yn negyddol i dermau fel Diwylliant Goruchafiaeth Gwyn – i eraill, mae’n adfywiol ac yn rhyddhad gweld y term yn cael ei ddefnyddio a’i ddeall mewn ffordd sydd ddim yn amddiffynnol.

Mae’r erthygl hon yn ddefnyddiol ar gyfer deall gwahanol ddiwylliannau sefydliadol (boed dan arweiniad gwirfoddolwyr neu weithwyr), a sut y gallant ddieithrio ac aflonyddu’n anfwriadol trwy fod yn ddiwylliannau goruchafiaeth gwyn eu natur.

Mae’n werth nodi bod y nodweddion hyn yn effeithio ar bobl sydd ag anableddau, yn ogystal â Phobl Dduon a Phobl o Liw.

Un o’r rhesymau ynghylch rhestru nodweddion diwylliant goruchafiaeth gwyn yw i dynnu sylw at sut mae sefydliadau sy’n defnyddio’r nodweddion hyn yn anymwybodol fel eu normau a’u safonau yn ei gwneud hi’n anodd, os nad yn amhosibl, i agor y drws i normau a safonau diwylliannol eraill. O ganlyniad, mae llawer o’n sefydliadau, wrth ddweud ein bod eisiau bod yn amlddiwylliannol, dim ond yn caniatáu i bobl a diwylliannau eraill ddod i mewn os ydyn nhw’n addasu neu’n cydymffurfio â normau diwylliannol sydd eisoes yn bodoli. Mae gallu adnabod ac enwi’r normau a’r safonau diwylliannol rydych chi eu heisiau yn gam cyntaf tuag at wneud lle i sefydliad gwirioneddol amlddiwylliannol.