Julian Rosser yn cael ei benodi fel Pennaeth newydd Hub Cymru Africa

Mae Hub Cymru Africa wedi penodi Julian Rosser fel ei Bennaeth Partneriaeth newydd.

Mae Julian yn dechrau yn ei swydd o arwain Hub Cymru Africa, ar ôl bod yn gweithio a gwirfoddoli yn y trydydd sector am fwy na 35 mlynedd.

Yn wreiddiol o Ben-y-bont ar Ogwr, mae Julian yn gefnogwr ac ymgyrchydd brwd dros undod byd-eang, ac mae wedi gwirfoddoli a gweithio i sefydliadau sy’n cynnwys Ffrindiau’r Ddaear Cymru, Pwyllgor Argyfwng Trychinebau Cymru, Oxfam Cymru, a Cymru Masnach Deg. Yn ddiweddar, arweiniodd Julian dîm Rheolwyr Cymorth Datblygu Hub Cymru Africa i gefnogi cysylltiadau Cymru-Affrica a grwpiau eraill o Gymru sy’n gweithio dros undod byd-eang.

Mae Julian yn dechrau’r rôl hon ar adeg bwysig ar gyfer Partneriaeth Hub Cymru Africa. Wrth i’r sefydliad fynd i mewn i’w ail ddegawd, bydd Llywodraeth Cymru newydd yn bodoli’r flwyddyn nesaf, a chyd-destun rhyngwladol lle bydd gwledydd cyfoethog yn torri gwariant ar gymorth rhyngwladol a lle bydd undod byd-eang dan fygythiad.

Wrth groesawu ei benodiad, meddai Cadeirydd Hub Cymru Africa, Tom Baker:

“Mae’n bleser gennyf groesawu Julian i’r rôl Pennaeth Partneriaeth. Mae’n adnabyddus i lawer ar draws y sector. Bydd ei brofiad eang dros y deg mlynedd ar hugain diwethaf yn ei wneud yn arweinydd effeithiol, ac rwy’n edrych ymlaen at ei weld yn llwyddo, ac yn arwain y bartneriaeth ymlaen yn ystod y cyfnod tyngedfennol hwn.”

Wrth ymateb i’w benodiad, meddai Julian:

“Mae’n fraint bod wedi cael fy mhenodi’n bennaeth newydd Hub Cymru Africa. Rwyf wedi ymgyrchu dros ddatblygiad cynaliadwy a chydraddoldeb rhyngwladol am fwy na 35 mlynedd, ac wedi eu cefnogi, ac rwyf wedi mwynhau gweithio i Hub Cymru Africa yn ystod y blynyddoedd diwethaf fel Uwch Reolwr Cymorth Datblygu.

“Rwy’n cael fy ysbrydoli bob dydd gan y bobl a’r sefydliadau gwych ac amrywiol sy’n ffurfio’r sector yng Nghymru, ac maen nhw’n creu argraff fawr arnaf. Rwy’n gyffrous i arwain y bartneriaeth a’r tîm i mewn i ail ddegawd Hub Cymru Africa, ac rwy’n gobeithio ei wneud hyd yn oed yn fwy llwyddiannus na’r cyntaf.”

Meddai Prif Weithredwr Panel Cynghori Is-Sahara, Fadhili Maghiya:

“Rwy’n falch dros ben fod Julian wedi cael ei benodi ar gyfer y rôl hon o fewn ein tîm wrth i Hub Cymru Africa fynd i mewn i’w ail ddegawd. Mae gan Julian lawer o brofiad o weithio gyda chymunedau ar draws Cymru i hyrwyddo undod byd-eang, ac rwy’n edrych ymlaen at weithio gyda ef yn fwy aml i wneud yr union bethau hynny.”

Nodiadau i olygyddion:

Mae Hub Cymru Africa yn bartneriaeth sy’n cynnwys Canolfan Materion Rhyngwladol Cymru (WCIA), Cymru Masnach Deg, Panel Cynghori Is-Sahara a Phartneriaethau Iechyd Byd-eang Cymru.

Mae Hub Cymru Africa yn sefydliad datblygu rhyngwladol ac undod byd-eang blaenllaw Cymru. Sefydlwyd Hub Cymru Africa ym mis Ebrill 2015 i ddod â gwaith ei bartneriaid at ei gilydd a chefnogi sefydliadau ar draws Cymru i adeiladu cysylltiadau a phrosiectau cynaliadwy mewn partneriaeth â sefydliadau yn Affrica ac ar draws y byd. Mae’n cefnogi grwpiau ac unigolion amrywiol a bywiog yng Ngymru – ymgyrchwyr masnach deg, grwpiau diaspora, staff y GIG, sefydliadau cymunedol a ffydd ac elusennau – i gyfrannu at ddatblygiad byd-eang sy’n gyfrifol ar lefel gymdeithasol.

Mae gwaith Hub Cymru Africa yn canolbwyntio’n bennaf ar iechyd, addysg, bywoliaeth a’r amgylchedd. Drwy godi ymwybyddiaeth, polisïau a hawliau, symudiad cymunedol, a mentora a chymorth datblygu, mae’n helpu’r sector gwirfoddol a’r sector cyhoeddus yng Nghymru i gyfrannu at y Nodau Datblygu Cynaliadwy drwy ddatblygiad rhyngwladol.

Mae Hub Cymru Africa yn cael ei ariannu drwy grantiau gan Raglen Cymru ac Affrica Llywodraeth Cymru a Swyddfa Dramor, y Gymanwlad a Datblygu Llywodraeth y DU.

Ar gyfer cyfweliadau yn Gymraeg neu’n Saesneg, cysylltwch â:

Peter Frederick Gilbey, Rheolwr Cyfathrebu
petergilbey@hubcymruafrica.wales
07495 008 927