EN
EN
Mae Hub Cymru Africa yn cynrychioli’r sector undod byd-eang yng Nghymru, ac yn cefnogi gwaith ymgyrchu’r sector a phrosiectau partneriaeth rhwng Cymru ac Affrica i hyrwyddo Nodau Datblygu Cynaliadwy’r Cenhedloedd Unedig. Ein gweledigaeth yw creu Cymru sy’n gyfrifol ar lefel fyd-eang, ac sy’n gweithredu mewn undod gyda phobl Affrica. Ein cenhadaeth yw sbarduno newid a chyfrannu at ganlyniadau datblygu byd-eang drwy gefnogi cymuned Cymru/Affrica.
Rydym yn chwilio am weithiwr cyfathrebu creadigol proffesiynol. Bydd y Rheolwr Cyfathrebu yn arwain ac yn darparu cyfathrebu dwyieithog llawn ar gyfer Hub Cymru Africa, ac yn ymgysylltu’n effeithiol â’r cyhoedd, y cyfryngau ac mewn materion polisi. Byddant yn addasu’r cyfathrebu ar gyfer gwahanol sectorau a chynulleidfaoedd, yn unol â strategaeth HCA a gofynion cyllidwyr.
Bydd y Rheolwr Cyfathrebu yn sicrhau bod gan Bartneriaeth HCA strategaeth gyfathrebu gyffredin sydd yn cael ei deall a’i dilyn gan bob aelod o staff, sy’n helpu i gadw’r cyfathrebu yn gyson ar draws y sianeli cyfryngau gwahanol. Byddant yn cryfhau ein presenoldeb yn y maes darlledu a’r cyfryngau cymdeithasol, yn cynrychioli’r bartneriaeth i’r cyfryngau ac mewn digwyddiadau, ac yn chwarae rhan allweddol mewn hyrwyddo cyfraniad Cymru yn y meysydd undod byd-eang a datblygu rhyngwladol. Byddant hefyd yn gyfrifol am reoli’r cyfathrebu dydd i ddydd, gan gynnwys y cyfryngau cymdeithasol, podlediadau, golygu fideos, cynnwys y wefan, astudiaethau achos ac adroddiadau, ac yn gweithio gyda gwirfoddolwyr lle bo’n briodol.
Bydd y Rheolwr Cyfathrebu yn cydlynu digwyddiadau sydd yn cael eu trefnu gan y Bartneriaeth yn strategol, ac yn sicrhau eu bod yn cynnig cyfleoedd cryf i rwydweithio ar draws y sector, yn ogystal â gwireddu potensial eu proffil cyhoeddus. Byddant hefyd yn rhoi cyngor ac arweiniad i sefydliadau ar draws y sector ar sut i wella eu sgiliau cyfathrebu fel rhan o set fwy eang o gymorth datblygu sydd yn cael ei gynnig gan Hub Cymru Africa.
Rydym yn dîm hyblyg a chefnogol, gyda swyddfa yng nghanol Caerdydd. Gellir lleoli’r swydd hon yn unrhyw le yng Nghymru, er y bydd disgwyl i chi deithio weithiau ar gyfer cyfarfodydd a digwyddiadau.
Dim yn siŵr os ydy’r rôl hon yn iawn i chi? Os hoffech gael sgwrs gyda rheolwr y swydd, Pennaeth HCA, neu gydag un o’r Rheolwyr Cymorth Datblygu eraill yn y tîm, anfonwch e-bost at enquiries@hubcymruafrica.wales i drefnu amser.
Rydym yn croesawu ceisiadau’n arbennig, gan aelodau o gymunedau diaspora Affricanaidd yng Nghymru a hefyd, gan gymunedau eraill sydd yn cael eu tangynrychioli yn y sector ar hyn o bryd.
