Canolbwyntio ar ofal teulu: Beth sydd y tu ôl i ymgyrch newydd y DU ar ddiwygio gofal i blant?

Mae SWIDN, Hub Cymru Africa a Hope and Homes for Children, yn eich gwahodd i ddigwyddiad ar-lein cydweithredol, agored sydd yn canolbwyntio ar ddarparu gofal i blant sydd wedi’u hymyleiddio. Bydd y digwyddiad hwn, sydd wedi’i ddylunio i gysylltu a chefnogi elusennau a rhoddwyr yn y DU sy’n gweithio gyda phlant sy’n wynebu risg ar lefel rhyngwladol, yn rhannu adnoddau arfer da ac yn archwilio sut y gall cymdeithas sifil gymryd rhan yn ymgyrch fyd-eang Llywodraeth y DU ar gyfer gofal teulu.

Ym mis Ionawr 2025, cyhoeddodd yr Ysgrifennydd Tramor David Lammy AS, ynghyd â’r actor Gwyddelig Barry Keoghan, ymgyrch sawl blwyddyn sy’n eiriol dros symud i ffwrdd o ddarparu gofal sefydliadol (e.e. cartrefi plant amddifaid) a chynnig i blant symud i fod dan ofal teulu, sy’n rhoi pwyslais ar gariad, sefydlogrwydd, a diogelu. Mae’r fenter hon, sydd yn cael ei chefnogi gan y llywodraeth, yn cynnig fframwaith i elusennau a rhoddwyr sydd wedi’u lleoli yn y DU ar gyfer rhaglenni yn y dyfodol, ac yn cyfeirio at arferion gorau ar gyfer ymyriadau sy’n blaenoriaethu hawl plentyn i dyfu i fyny mewn amgylchedd teulu diogel, cariadus.

Bydd y digwyddiad rhad ac am ddim hwn ar-lein yn dadansoddi beth mae ymgyrch Llywodraeth y DU yn ei olygu ar gyfer elusennau, rhoddwyr a gweithwyr datblygu rhyngwladol, a bydd yn cynnwys straeon gan y rhai sydd â phrofiad bywyd, a chymorth ymarferol a hygyrch i gefnogi taith eich sefydliad.

Beth i’w Ddisgwyl

• Cyflwyniad i ddiwygio gofal – beth yw diwygio gofal a pham bod ei angen?
• Trosolwg o beth rydym yn ei wybod am ymgyrch Llywodraeth y DU ynghylch blaenoriaethau diwygio gofal, a beth mae’n ei olygu i elusennau a rhoddwyr sydd wedi’u lleoli yn y DU sy’n gweithio i gynorthwyo plant rhyngwladol sydd wedi’u hymyleiddio
• Storïau a myfyrdodau gan blant a phobl ifanc sydd â phrofiad bywyd o fyw mewn cartref gofal
• Cyfweliad gyda’r Parchedig Ruth Kahawa, a wnaeth drawsnewid ei helusen yn Uganda (Smile Africa) o fod yn gartref plant amddifaid i fod yn sefydliad sy’n darparu gofal amgen, dan ofal teulu.
• Cyfleoedd i rwydweithio a chydweithio gyda sefydliadau o’r un anian.
• Pecyn dilynol o adnoddau am ddim, sy’n cynnwys enghreifftiau o ymyriadau adfer llwyddiannus mewn cyd-destunau byd-eang gwahanol

Boed yn dechrau meddwl am symud i ffwrdd o ddefnyddio cartrefi plant amddifaid, neu yn gweithio yn y maes amddiffyn plant yn barod, ymunwch â ni i ddysgu, cysylltu, a helpu i adeiladu dyfodol lle mae pob plentyn yn tyfu i fyny o dan ofal teulu.