EN
< Newyddion

Diweddariad ar Grantiau Grymuso Menywod

Cydraddoldeb Ehywedd a Grymuso Menywod
Fel rhan o waith cydraddoldeb rhywedd Hyb Cymru Affrica a ariennir gan Lywodraeth Cymru, roeddem yn falch o allu dyrannu’r grantiau canlynol i bartneriaethau sy’n gweithio rhwng Cymru ac Uganda, a Chymru a Lesotho mewn prosiectau arloesol allweddol sy’n hyrwyddo cydraddoldeb rhywedd.

Uganda

Maint Cymru

Swm a ddyrannwyd: £50,000 Trwy integreiddio rhywedd i mewn i weithgareddau a pholisi newid hinsawdd sy'n gysylltiedig ag amaethyddiaeth, mae'r prosiect hwn yn galluogi menywod gwledig i ddod yn gyfryngau newid pwysig. Bydd y prosiect yn cynnal asesiad rhywedd i ddeall yn well y cyd-destun mewn perthynas â gallu menywod i gymryd rhan. Yn seiliedig ar yr asesiad hwn, bydd y prosiect yn cynnig cymorth i fenywod gyda hyfforddiant wedi'i deilwra, rhwydweithio a mynediad at adnoddau i hyrwyddo eu cyfranogiad a chryfhau bywoliaethau. Bydd y prosiect yn dogfennu arferion gorau, gwersi a ddysgwyd ac astudiaethau achos ysbrydoledig ymhlith partneriaid yng Nghymru ac Affrica a'r cyhoedd yng Nghymru. Mae’r prif weithgareddau’n cynnwys:
  • Asesiad rhywedd
  • Mapio ymrwymiadau polisi a chyfreithiol ar hawliau menywod a merched a mynediad at adnoddau naturiol, gan gynnwys tir
  • Hyfforddi 40 o hyrwyddwyr rhywedd (dynion a menywod)
  • Hyfforddi 222 o fenywod a merched o gefn gwlad ynghylch eu hawliau a'u sgiliau arweinyddiaeth
  • Cryfhau sefydliadau meicro-gyllido lleol i gefnogi mentrau sy’n gydnaws â’r hinsawdd.
  • Hyfforddiant a mewnbynnau ar gyfer 222 o fenywod a merched i gryfhau gweithgareddau cynhyrchu incwm, gan gynnwys mentrau seiliedig ar natur, a phlannu coed ar ffermydd dan arweiniad menywod
  • Y gymuned yn mynd ati i gipio data gan ddefnyddio technoleg mapio gwybodaeth ddaearyddol GIS syml.
  • Gweminar dysgu a chyfnewid gwybodaeth ar gyfer partneriaid
  • Ysbrydoli pobl yng Nghymru i weithredu ar yr hinsawdd trwy raglen addysg, cyfathrebu a pholisi prosiect Maint Cymru.
Bydd y prosiect yn cefnogi'r canlynol yn uniongyrchol:
  • 36 o grwpiau ffermio cymunedol yn ardal Masaka (menywod yw 1,462 o aelodau cofrestredig y grwpiau hyn - mae 90% yn fenywod, 10% yn ddynion
  • 10 grŵp Cynilo a Benthyciadau (cyfanswm o 250 o bobl - 40% yn ddynion a 60% yn fenywod) yn ardal Mbale, gan gyrraedd 1,750 o bobl ar lefel aelwyd.
Bydd y prosiect yn cefnogi 600,000 o bobl yn anuniongyrchol yn ardal Mbale a Masaka.

Bees for Development

Swm a ddyrannwyd: £50,100 Mae gan y prosiect dair prif strategaeth: Yn gyntaf, bydd yn defnyddio methodoleg meithrin gallu cymunedol cyfranogol (System Dysgu Gweithredu ar Rywedd) i feithrin dealltwriaeth o’r gymuned a dargedir a mynd i’r afael â rhwystrau ar sail rhywedd sy’n atal dynion a menywod rhag elwa’n gyfartal o gadw gwenyn. Nod y broses Dysgu Gweithredu ar Rywedd yw gwella gallu dynion a menywod i gydweithio a dysgu oddi wrth ei gilydd wrth gyflawni eu nodau economaidd o gadw gwenyn. Bydd yn hyrwyddo grymuso menywod a chydraddoldeb rhywedd trwy fynd i'r afael â normau a rheolau sefydliadol (rhai datganedig ac digrybwyll) sy'n cynnal sefyllfa anghyfartal menywod yn y Gadwyn Gwerth Mêl a Chwyr Gwenyn yn ardal Adjumani. Yn ail bydd y prosiect yn meithrin gallu 10 o Hyrwyddwyr Gwenyna i gynnal gwasanaethau estyn allan (gan dargedu 100 yn fwy o fenywod sy’n cadw gwenyn a'u teuluoedd) yn yr ardal. Nod y gweithgaredd hwn yw herio normau rhywedd mewn cadw gwenyn yn y cymunedau a dargedir, ar yr un pryd â chynyddu a gwella gwasanaethau estyn allan i fenywod (a dynion) sy’n cadw gwenyn yn yr ardal. Yn olaf, bydd y prosiect yn ysgogi, hyfforddi ac ardystio 10 o fenywod fel Meistri Gwenyna. Bydd hyn yn cynyddu nifer ac amlygrwydd menywod mewn arweinyddiaeth dechnegol a pholisi yn y sector. Bydd y menywod hyn yn gweithredu fel modelau rôl i fenywod eraill, gyda chefnogaeth TUNADO i sicrhau gwell cyfleoedd am gyflogaeth yn y sector cadw gwenyn. Yn ardal y Prosiect mae mynediad da i’r farchnad ar gyfer gwerthu mêl, a ddarperir yn arbennig gan Jephina honey – cwmni mêl sy’n eiddo i fenywod – a phrynwyr eraill. Mae hyn yn darparu cyswllt cryf â marchnadoedd da.

Teams4U

Swm a ddyrannwyd: £25,000 Bydd y prosiect yn hyfforddi 40 o athrawesau ar draws 20 o ysgolion yn Bukedea, Kumi a Katakwi i’w galluogi i hwyluso cymorth i gyfoedion trwy 1,600 o bobl ifanc mewn 20 o glybiau ar gyfer y rhai sydd yn eu harddegau. Bydd y clybiau hyn yn cyfarfod bob pythefnos ac yn ethol 2 hyrwyddwr i fod yn gyfrifol am y clwb a darparu adborth o fewn cymuned ehangach yr ysgol trwy gynnal gwasanaethau a dosbarthiadau. Bydd disgyblion yn cael eu hannog i wirfoddoli i gymryd rhan a chael eu dewis ar hap ar gymhareb o 70% merched, 30% bechgyn. Yn ogystal, bydd y prosiect hwn yn hyfforddi rheolwyr ysgol ac yn cynnal Grwpiau Ffocws ar gyfer trafodaeth gyda 500 o rieni er mwyn annog mabwysiadu agweddau ac ymddygiadau mwy cefnogol tuag at ferched yn eu harddegau. Darperir padiau mislif y gellir eu hailddefnyddio a gynhyrchwyd yn lleol i ddisgyblion o oedran mislif. Bydd y prosiect hwn yn gweithio'n agos gyda llywodraeth leol, gan ddefnyddio eu timau Arolygiaeth Ysgolion, i ddynodi a diogelu’r merched hynny sydd fwyaf mewn perygl o roi'r gorau i fynd i’r ysgol. Bydd hyfforddiant yn cael ei ddarparu ynghylch y canlynol:
  • Hwyluso cymorth dan arweiniad cyfoedion i fynd i’r afael â normau rhywedd patriarchaidd niweidiol er mwyn meithrin hyder a gwydnwch
  • Hyrwyddo agweddau cefnogol ymhlith y gymuned ehangach, mynd i’r afael â stigma iechyd atgenhedlu a’i gysylltiadau â phriodas wedi’i gorfodi, trais ar sail rhywedd a rhyw am arian
  • Diogelu merched sy’n agored i niwed yn unol â pholisi'r llywodraeth.
Mae’r clybiau hyn yn darparu mecanwaith cynaliadwy a arweinir yn lleol i ddisgyblion sy’n ferched fynegi eu lleisiau a’u blaenoriaethau o fewn corff yr ysgol, a chyda’u cyfoedion gwrywaidd; hyn yn ogystal â dynodi merched mewn perygl sydd angen mwy o gymorth, a newid normau rhywedd niweidiol sy’n arwain at ferched yn rhoi'r gorau i fynd i’r ysgol. Bydd hefyd yn rhoi cyfle ar gyfer hyfforddiant a ymarfer rheolaidd i athrawesau, ar ôl misoedd lle bu ysgolion ar gau, i'w cynorthwyo i ddychwelyd i addysgu. Y nod yn y pen draw yw i’r 20% o ferched a amcangyfrifir i fod mewn perygl o’i chael yn anodd dychwelyd ac aros yn yr ysgol i barhau â’u haddysg.

Lesotho

Dolen Cymru

Swm a ddyrannwyd: £61,100 Mae menywod yn Lesotho yn profi TSRh bron bob dydd, ond maent yn amharod i naill ai adrodd am yr achosion hyn neu fynd â’r mater yn ei flaen unwaith y caiff ei reportio; un o'r rhesymau am hyn yw darpariaeth gwasanaeth aneffeithiol ac ansensitif, yn bennaf a ran yr Heddlu. Mae hyn yn rhwystro mynediad at gyfiawnder i ddioddefwyr a goroeswyr. Nod y prosiect hwn yw:
  • Cynyddu gwybodaeth yr heddlu ac arweinwyr cymunedol wrth ymdrin ag adroddiadau am TSRh
  • Datblygu amgylchedd cefnogol i ddioddefwyr a goroeswyr adrodd am achosion o TSRh
  • Cryfhau partneriaeth rhwng yr Heddlu lleol ac Arweinwyr Cymunedol
  • Grymuso goroeswyr TSRh i adennill ymreolaeth seicolegol a chorfforol.
Trwy lunio llawlyfrau syml a chyflwyno cyfres o sesiynau hyfforddi sy'n ymdrin â chynnwys sylfaenol megis dadansoddi deinameg pŵer perthynol, egwyddorion ymreolaeth ac uniondeb corfforol a seicolegol a'r cyfreithiau sy'n amddiffyn goroeswyr, bydd y prosiect hwn yn adeiladu gallu'r heddlu ac arweinwyr cymunedol i ymateb i achosion TSRh.  Bydd yn cryfhau’r bartneriaeth rhwng yr heddlu ac arweinwyr cymunedol i wella’r broses o adrodd am achosion TSRh a bydd yn galluogi arweinwyr cymunedol i ddal yr heddlu’n atebol. Mae'r hyfforddiant hwn yn cael ei ddarparu yn ardaloedd Maseru, Berea, Leribe a Mafeteng.

Erthyglau Eraill

 Gweld pob un
Pharmaceutical Society of Malawi (PHASOM)
Newyddion

Arweinyddiaeth ym Malawi: Partneriaeth Fferyllfa Gwrthficrobaidd Malawi-Cymru

Iechyd Gweld yr erthygl
New Chair of Hub Cymru Africa meeting with the co-Chair of SSAP, Fred Zimba.
Newyddion, Datganiadau i'r Wasg

Tom Baker yn cael ei benodi fel Cadeirydd newydd Hub Cymru Africa

Gweld yr erthygl
Newyddion

Stori Saffron

Masnach DegGwirfoddoli Gweld yr erthygl
Newyddion

Hub Cymru Africa yn cyhoeddi Panel Cynghori Is-Sahara, sydd dan arweiniad cymunedau diaspora, fel ei bartner lletya newydd

Diaspora

Ddeng mlynedd ar ôl sefydlu partneriaeth Hub Cymru Africa, bydd Panel Cynghori Is-Sahara yn cymryd yr awenau oddi wrth Ganolfan Materion Rhyngwladol Cymru, fel y partner lletya newydd. Ar ôl treulio 10 mlynedd yn gweithredu fel partner lletya Partneriaeth Hub Cymru Africa, bydd Canolfan Materion Rhyngwladol Cymru (WCIA) yn cael ei disodli fel partner lletya […]

Gweld yr erthygl
Newyddion, Datganiadau i'r Wasg

Cymuned Cymru ac Affrica yn dathlu tair blynedd o undod byd-eang

Celfyddydau a DiwylliantDiasporaAmrywiaeth a ChynhwysiantMasnach DegIechydHawliau DynolBywoliaethau Cynaliadwy Gweld yr erthygl