Cysylltu penderfyniadau byd-eang â gweithredu lleol

Mae UK Alliance yn gwahodd sefydliadau cymdeithas sifil sy’n gweithio ar draws y byd i fynychu sesiwn ar-lein am ddim ar y G20 a Civil 20 (C20) cyn llywyddiaeth y DU o’r G20.

Mae’r fforwm G20 yn dod â 19 o economïau mwyaf y byd at ei gilydd, yn ogystal â’r Undeb Ewropeaidd a’r Undeb Affricanaidd, sy’n cynrychioli 85% o GDP y byd, 75% o fasnach ryngwladol, a dwy ran o dair o boblogaeth y byd.

Fel Llywydd y G20 yn 2027, bydd y DU yn cael cyfle i ddylanwadu ar gamau gweithredu ynghylch rhyddhad dyled, newid hinsawdd ac economi fyd-eang decach.

Y C20 yw grŵp ymgysylltu swyddogol cymdeithas sifil y G20, sy’n galluogi elusennau, sefydliadau dielw, mudiadau cymdeithasol a sefydliadau cymdeithas sifil eraill i gyflwyno safbwyntiau llawr gwlad a blaenoriaethau cymunedol i drafodaethau byd-eang.

Bydd y sesiwn ymarferol a hygyrch hon, sy’n para 90 munud, yn cysylltu trafodaethau polisi byd-eang gyda gwaith bob dydd sefydliadau a chymunedau. Byddwch yn clywed safbwyntiau gan bartneriaid ar draws y byd, yn dysgu ffyrdd syml o ymgysylltu â llunwyr penderfyniadau, yn archwilio cyfleoedd sy’n gysylltiedig â’r G20 a’r C20, ac yn cyfnewid syniadau gyda sefydliadau cymdeithas sifil eraill. Bydd y rhaglen yn canolbwyntio ar safbwyntiau byd-eang cynhwysol, ac yn cydnabod y lefelau gwahanol o amser a chapasiti sydd ar gael ar draws y sector.

Bydd y siaradwyr yn cynnwys:

• Osai Ojigho, Pennaeth Polisi a Dylanwadu, Cymorth Cristnogol, y DU
• Riska Koopman, Tax Justice Network, De Affrica
• Ishmael Zula, Tax Justice Network Africa, Zambia

Fformat: Ar-lein drwy Zoom ac ar agor i sefydliadau cymdeithas sifil sy’n gweithio ar draws y byd. Mae’r sesiwn wedi’i dylunio ar gyfer pobl sydd ag unrhyw lefel o wybodaeth neu brofiad blaenorol. Dilynwch y ddolen i gofrestru i fynychu ac/neu i dderbyn recordiad o rannau allweddol o’r digwyddiad.

Mae UK Alliance yn cynnwys Hub Cymru Africa (Cymru), BOND (y DU gyfan), CADA (Gogledd Iwerddon), SIDA (Yr Alban), South West International Development Network (De-orllewin Lloegr) a Small International Development Charities Network (y DU gyfan).